१० जेठ, काठमाडौं । काठमाडौंमा जारी काभा महिला भलिबल च्याम्पियनसिप अन्तर्गत समूह ‘ए’ को आफ्नो तेस्रो तथा अन्तिम खेलमा नेपालले आज माल्दिभ्ससँग प्रतिस्पर्धा गर्दैछ । यो खेल नेपालका लागि सेमिफाइनल प्रवेशको दृष्टिले अत्यन्त महत्वपूर्ण मानिएको छ ।
नेपाल र माल्दिभ्सबीचको खेल त्रिपुरेश्वरस्थित दशरथ रंगशाला कभर्डहलमा साँझ ५ बजेबाट सुरु हुनेछ । प्रतियोगिताको रोमाञ्चकता र दर्शकको उत्साहलाई ध्यानमा राख्दै खेललाई प्रत्यक्ष रूपमा हिमालय स्पोर्ट्स च्यानलमार्फत प्रसारण गरिनेछ ।
नेपालले यसअघि खेलेका दुई खेलमध्ये एकमा जित र एकमा हारको नतिजा निकालेको छ । पहिलो खेलमा नेपाल चिरपरिचित प्रतिद्वन्द्वी भारतसँग पाँच सेटसम्म चलेको कडा प्रतिस्पर्धामा पराजित भएको थियो । तर दोस्रो खेलमा किर्गिस्तानविरुद्ध उत्कृष्ट प्रदर्शन गर्दै सोझो सेटमा जित निकालेर टोलीले पुनः लय समातेको थियो ।
हालको अवस्थामा नेपाल समूह ‘ए’ मा दुई खेलबाट ४ अंकसहित दोस्रो स्थानमा रहेको छ । समूहमा भारत ५ अंकसहित शीर्ष स्थानमा छ भने किर्गिस्तान ३ अंकसहित तेस्रो स्थानमा रहेको छ । लगातार दुई खेलमा पराजित भएको माल्दिभ्स भने प्रतियोगिताबाट बाहिरिसकेको छ ।
नेपालले आजको खेलमा माल्दिभ्सलाई सोझो सेटमा पराजित गर्न सके ७ अंकसहित सेमिफाइनलमा स्वतः प्रवेश गर्नेछ र समूहका अन्य खेलको नतिजामा निर्भर रहनु पर्नेछैन । त्यसैले यो खेल नेपाली टोलीका लागि ‘नो लस गेम’ जस्तै महत्वपूर्ण बनेको छ ।
नयाँ कप्तान निरुता ठगुन्नाको नेतृत्वमा रहेको नेपाली टोलीमा यस पटक युवा खेलाडीहरूको बाहुल्य रहेको छ । टोलीमा समावेश गरिएका ६ नयाँ खेलाडीमध्ये ५ जनाले यसअघि नै राष्ट्रिय टोलीमा डेब्यु गरिसकेका छन्, जसले टोलीमा नयाँ ऊर्जा थपिएको देखिन्छ ।
आजै अन्य समूहगत खेलहरू पनि हुनेछन् । समूह ‘बी’ अन्तर्गत दिउँसो १२ बजे इरान र श्रीलंकाबीच प्रतिस्पर्धा हुनेछ भने दिउँसो साढे २ बजे काजाखस्तान र बंगलादेश आमनेसामने हुनेछन् ।
काभा महिला भलिबल च्याम्पियनसिपका सबै खेलहरू हिमालय स्पोर्ट्स टेलिभिजनमार्फत प्रत्यक्ष प्रसारण भइरहेका छन्, जसले प्रतियोगितालाई देशभरका खेलप्रेमीसम्म सहज रूपमा पुर्याइरहेको छ ।
